Komunikado di prensa

UN PROSESO TRANSPARENTE DI PMO PA LOGRA PARTNER STRATEGIKO PA E FASILIDATNAN PETROLERO DI KORSOU

Willemstad 31 di Ougùstùs 2020-  E Project Management Organization (PMO) di Refineria di Kòrsou (RdK), ta realisando un proseso transparente dirigí pa konkretisá un solushon stratégiko di término largu pa e fasilidatnan petrolero di Kòrsou, esta e refineria, e parke di tankinan na Bullenbaai i e planta di utilidat (CRU). Resientemente diestres (13) partido, ku a demonstrá interes pa partisipá den e proyekto Arawak, a keda invitá pa entregá un asina yamáa“non-binding proposal” pa mas tardá 5 di Òktober 2020. Tur partido a firma un akuerdo di “non-disclosure agreement” òf NDA na momentu ku nan a ekspresá nan interes pa partisipá. Pa mas tardá trempan den Desèmber lo anunsiá e partido ku a keda skohé komo e partido preferí pa kuminsá negoshá kuné pa yega na un kontrakt final

Un “non-disclosure agreement” òf NDA, ku partidonan interesá, ta algu normal den e tipo di transakshon internashonal multi-mionario asin’aki. RdK mester duna partidonan akseso na un “data room” virtual den kua tin informashon komersial i tékniko konfidensial tokante di e fasilidatnan. 

E partidonan ku ta partisipá mes tampoko no ke pa nan kompetidó sa di nan moveshonnan stratégiko, pasombra e por impaktá nan bentaha kompetitivo. Komo tal RDK a adoptá un maneho di komunikashon pa asina por hiba un proseso transparente ku lo perkurá si pa e konfidensialidat rekerí na partidonan ku ta partisipá na e proseso.

Partido interesá ku a keda selektá mester kontestá preguntanan tokante di nan operashon proponé pa e fasilidatnan, nan eksperensha den manehá un refineria, nan abilidat pa optené krudo i produktonan ku nan ta pensa di bende riba merkado. Banda di esaki partidonan mester presentá prueba di un tin akseso na medionan finansiero sólido pa por kumpli ku obligashonnan finansiero den futuro.  E proseso mas aleu ta repartí den e siguiente fasenan:

  • Partidonan ta entregá non-binding proposals: PMO, huntu ku su konseheronan, ta evaluá promé ku fin di Oktober e non-binding proposals ku a risibí di e partidonan interesá.
  • Lista kòrtiku selektá:  Un kantidat limitá di partidonan lo keda selektá pa entregá proposishon/oferta definitivo.  Esaki ta tuma lugá pa mas tardá medio Novèmber 2020.
  • Ta kuminsá negoshá:  E tim di negosiashon di PMO lo skohé un partido(e preferred bidder), ku kua lo start negosiashon den Desèmber 2020.

E meta ta pa finalisá e negosiashonnan den e promé kuartal di 2021. RdK lo sigui mantené komunidat informá tokante di e progreso di e proyekto Arawak.

-FIN-