Komunikado di prensa

RDK TA PIDI PARTIDONAN ENTREGÁ MUESTRA DI INTERES PA OPERÁ E REFINERIA DI KÒRSOU

Willemstad 9 di Ougùstùs 2020 – Refineria di Kòrsou (RdK) resientemente a finalisá e proseso di negosashon eksklusivo ku e partido selektá pa operashon di e fasilidatnan petrolero di Kòrsou.  Ku terminashon di e proseso aki, RdK ta den posishon pa kuminsa un proseso nobo i buska otro partidonan ku ta interesá den operashon di e fasilidatnan petrolero di RdK

E fasilidatnan petrolero di Kòrsou ta konsistí di un refineria, e terminal na Bullenbaai i e planta di utilidat integrá.  Dia 6 di Ougùstùs, RdK a inisiá un proseso nobo di buskeda pa partidonan intersá pa partisipá den Proyekto Arawak.  E mandato ta pa selektá un partner pa término largu pa e fasilidatnan petrolero di Kòrsou.  E Project Management Team (PMO), instalá pa RdK, a saka un asina yama ‘teaser letter’ pa algun partido selektá.  Otro kompanianan ku ta interesá por tuma kontakto ku Ed Scardaville di IHS-Markit pa medio di e-mail Project.Arawak@ihsmarkit.com.  E último fecha ku partidonan por entregá nan notifikashon ku nan tin interes ta 14 di Ougùstùs 2020.

PMO a inisiá un proseso transparente, ku kriteria bon definí, pa selektá potenshal operadónan.  Importante den e selekshon ta ku e partidonan tin akseso na krudo i asina yamá ‘product off-take markets’, meskos tambe ku rekurso finansiero pa atende ku e mantenshon atrasá riba e refineria.  PMO tin un proyekshon di e lokenan  lo tuma lugá den e lunanan ku ta sigui.  Pa medio Ougùstùs lo manda un petishon pa un oferta pa partidonan ku kumplí ku e kriteria di selekshon.   Ta spera ku pa medio Òktober partidonan por presentá un asina yamá ‘non-binding proposal’.  Rdk, pa mas tardá medio Novèmber, 2020 lo firma un karta di intenshon ku partidonan ku tin e mihó oferta.  PMO ta spera di por a selektá e partido preferí pa negoshá kuné na Desèmber 2020 i mesora kuminsá negosashon ku e partido selektá.

-FIN-