Gobièrnu di Kòrsou (GdK) ta doño di un refineria di petroli, un terminal pa almasenamentu di petroli i un kompania di utilidat (CRU) – konhuntamente yamá ‘e Fasilidatnan Petrolero’ – via di Refineria di Kòrsou NV (RdK), ku ta 100% di gobièrnu.
Aktualmente, RdK ta operá e Fasilidatnan Petrolero. Durante e 34 añanan promé ku esaki, un filial di Petróleos de Venezuela S. A. (PDVSA) a operá e Fasilidatnan Petrolero a base di kòntraktnan di hür di durashon largu, ku a vense riba 31 di desèmber 2019.

GdK i RdK ta buskando un òf mas partner stratégiko pa usa, operá, mantené i modernisá e Fasilidatnan Petrolero. E opshonnan di kolaborashon ku ta ofresé ta: hür di durashon largu, benta di bienes ku e tereno na hür di durashon largu, negoshi mútuo òf un akuerdo den kua tur fasilidat, produkto prima i produkto derivá ta di GdK i RdK mientras ku e partner(nan) stratégiko ta hasi e trabounan nesesario kontra pago (tolling agreement); por kombina e tolling agreement ku un di e otro opshonnan menshoná. E plan ta pa kuminsá e operashonnan den e promé kwartal di 2021. E proyekto akí ta karga e nòmber di kódigo ‘Project Arawak’.

E Fasilidatnan Petrolero ta kontribuí en grande na e ekonomia lokal, dunando un aporte supstansial na e Produkto Interno Brutu, empleo, nivel di plaka strañero i impuesto.

Algun di e puntonan positivo pa merkadeá e Fasilidatnan Petrolero spesífiko akí, ta: ku nan ta situá pafó di e ruta di orkannan karibense, nan ta e ubiká riba e rutanan internashonal prinsipal pa transporte di petroli i di produktonan refiná entre e kontinentenan merikano i ku nan ta poseé hafnan natural ku awanan hundu.

Otro puntonan faborabel pa konsiderá ta e sistema legal stabil ku ta kai bou di e Korte Supremo hulandes i e sistema di impuesto ku ta atraktivo pa invershonista. 
Ademas e Fasilidatnan Petrolero akí ta brinda un plataforma físiko pa produkshon i negoshi petrolero. Tambe nan ta duna akseso na fasilidatnan di refineria ku por produsí kombustibel ku ta kumpli ku e eksigensianan nobo di IMO 0.5% S ku tin den e regulashon pa almasenamentu di produktonan petrolero.

Miembronan di Program Management Organization

program-managment-en