Komunikado di prensa

Despues ku 25 partido a mustra interes

PMO TA KONTINUÁ KU BÚSKEDA DI E MIHÓ PARTNER STRATÉGIKO PA NOS FASILIDATNAN PETROLERO.

Willemstusgad 18 di Ougùstùs 2020- Djabierne 14 di Ougùstùs último tabata e fecha pa entrega e “Expression of Interest” di interesadonan den proyekto Arawak. Na e momentu aki por konfirmá ku 25 partido a mustra interes pa bira e operador nobo di e fasilidatnan petrolero ku nos ta ofresé.

Project Management Organization (PMO) di RdK den su konstelashon nobo i mas chikí a sigui traha riba e búskeda di un partner stratégiko pa e fasilidatnan petrolero di Korsou. Dia 8 yüli Hunta di Komisario i Konseho di Minister a aprobá pa kontinuá ku e proyekto Arawak bou di guia di PMO.

Dia 31 di yüli último PMO, atrabes di nan konsehero IHS-Markit, a saka mas ku 50 “teaser letters” huntu ku e petishon pa ekspresá interes (“expression of interest”) pa interesadonan den e proyekto Arawak ku por trese un solushon duradero pa nos refineria, kapasidat di almasenahe na Bullenbaai i planta di utilidat di CRU.

Pa por selektá partnernan potensial pa RDK e interesadonan mester kontesta algun pregunta klave riba nan eksperensia di operashon di refineria, riba nan abilidat pa obtené krudo i merkadeo di produktonan. Ademas nan mester por presentá garantianan finansiero sólido pa por kumpli ku nan obligashonnan.

E mandato ku PMO a risibí ta pa buska un partner ku kier “lease”, forma un “joint venture”, kumpra òf kombiní un akuerdo di tolling ku nos. Dia 21 di ougùstùs lo saka e invitashonnan i e interesadonan ku mihó por kumpli ku e obligashonnan ku a pone pa por operá e fasilidatnan tin ku entrega un “non- binding proposal“ promé ku 8 di òktober próksimo.

RdK i Gobièrnu a aprobá un “time line” nobo pa e proyekto aki. RdK lo keda informá komunidat regularmente riba e progreso di búskeda di un operador nobo pa nos fasilidatnan petrolero.

-END-