Negosashon pa un operado

Resientemente gerensha i hunta di direktiva di Refineria di Kòrsou (RdK) a tuma e desishon pa instalá dos (2) tim nobo ku e propósito pa yega na un akuerdo entre RdK ku e kompania ku a keda selektá pa medio di un proseso di selekshon pa operá nos fasilidatnan petrolero (CORC BV).  Gerensha i hunta di direktiva di Refineria di Kòrsou (RdK) a gradisí i rekonosé e trabou balioso ku e Project Management Organization (PMO) a realisá.  RdK a forma un tim negoshadó pa negoshá e kontrato ku e futuro prospekto operadó. Banda di esaki RdK a instituí un tim di sosten ku ta asisití Gobièrnu i e otro entidatnan di Gobièrnu. Di e forma aki ta fasilitá e trabounan i laga e prosesonan kana mas fásil.

E meta final ta pa mas tardá promé ku Mart próksimo yega na un akuerdo entre RdK i CORC BV. Na mes momento e tim di Gobièrnu, ku ta negoshá e akuerdo di maneho i operashon di fasilidatnan, lo mester kaba tambe ku e parti di un akuerdo gubernamental i yega na akuerdonan komplementario ku kompanianan di gobièrnu pa mesun fecha.  

Den e akuerdo gubernamental lo mester yega na palabrashon tokante entre otro tópikonan manera medio ambiente, asuntunan fiskal, laboral i tambe otro tópikonan importante ku ta relevante pa por operá e fasilidatnan petrolero di Kòrsou.