Komunikado di prensa

HORIZONTE NOBO A KEDA PRESENTÁ NA STAKEHOLDER KOMO INISIO DI TRANSISHON ENERGÉTIKO NA KÓRSOU

Willemstad 4 di Òktober 2020- Refineria di Kòrsou (RdK) resientemente a introdusí “Horizonte Nobo”, un inisiativa ku mester duna kontenido na e transishon energétiko di Kòrsou i tambe pone e base pa Kòrsou komo eksportadó di energia bèrdè. Durante di un seshon virtual, na kua a partisipá tambe Minister Presidènt Sr. Eugene Rhuggenaath, Minister di Desaroyo Ekonómiko dr. Steven Martina i Minister di Tráfiko, Transporte i Planifikashon Urbano Sra. Zita Jesus-Leito, a presentá “Horizonte Nobo” na un grupo di stakeholders. Esaki ta e promé di un seri di seshon pa stakeholdernan tantu lokal komo na Ulanda. E meta ta pa introdusí “Horizonte Nobo” i di e forma aki krea oportunidat pa tur komentá riba e ambishon di Kòrsou, pa amplia konosementu tokante di esaki, redusí kostonan di energia i stimulá diversifikashon ekonómiko.
RdK, banda di buska kontinuashon duradero di nos refineria i almasenahe di petroli i produktonan derivá di petroli, ta traha tambe ya pa algun tempu riba transishon energétiko pa e fasilidatnan aki riba término korto i tambe riba mesun transishon riba término largu pa komunidat di Kòrsou. Remarkabel ta ku e transishon aki ta bai mas leu ku simplemente produkshon alternativo di koriente. Ta wak tambe e nesesidat i konsumo di energia pero tambe posibilidat pa produsí i hasta eksportashon di kombustibel alternativo. Tur esaki bou di e nòmber “Horizonte Nobo”. Un Living Lab ta forma parti di “Horizonte Nobo”. RdK no por desaroyá esaki riba su so i p’esei ta hasi uso di e ekspertisio i eksperensha di TNO. Huntu a inisiá un investigashon ku tin komo título “Na kaminda pa un Living Lab na Kòrsou.” E resultadonan provishonal di e investigashon riba tereno di simulashon di mobilidat den un asina yamá “Digital Twin” ta mustra oportunidatnan interesante pa sigui desaroyá un transishon energétiko pa Kòrsou. Ta evaluá, na e momentu aki, seriamente e posibilidat pa transporte públiko duradero den kuadro di uso di energia duradero.
E Digital Twin aktualmente ta ubiká na Universidat di Kòrsou i ta konektá ku TNO na Ulanda pa sigui desaroyá.

RdK for di na momentu ku a bira bisto ku lo tin terenonan ku lo a bin liber na momentu ku yega na un akuerdo ku un partner pa kontinuá ku e refineria na un forma duradero, a start ku desaroyo di e sobrá terenonan ku a bin liber. Pesei a firma na yüni último tambe un akuerdo ku TNO pa e investigashon den kuadro di Living Lab.

Durante di e próksimo simannan lo tuma lugá presentashon na mas gruponan den komunidat, pero tambe komunidat en general, p’asina informá i envolví un i tur den e desaroyo interesante aki pa Kòrsou.

-FIN-