Komunikado di prensa

EKSTENSHON DI 2 SIMAN PA ENTREGA DI PROPOSISHON OBLIGATORIO (BINDING PROPOSAL)

Willemstad, 27 di Novèmber 2020 – Den un komunikado di prensa fechá 29 di Òktober, RdK a informá komunidat riba e estado di e proseso di búskeda di un partner stratégiko pa nos fasilidatnan petrolero. 

Ya na e momentu aki, konforme e skema di trabou di Project Management Organization (PMO), a yega awor na e fase di risibí i evaluá e ofertanan obligatorio (“binding proposal”) di e partidonan ku a mustra interes i a keda selektá pa e fase final aki. Riba petishon di algun partido ku a sobra den e proseso importante aki pa nos pais, a yega na un akuerdo pa posponé entrega di e proposishonnan obligatorio pa mas tardá dia 11 di Desèmber awor, enbes di e promé fecha planeá ku tabata 27 di Novèmber.  E motibu prinsipal pa duna e partidonan mas tempu pa entregá un proposishon, ta pa brinda nan espasio pa por yega na proposishonnan mas balansá, hasi pregunta i formalisá nan “due diligence” i tambe laga partidonan ku a forma un konsorsio internashonal pa kaba di regla e último puntonan di akuerdo interno.

Despues di e fecha di entrega, aktualmente fihá riba 11 di Desèmber, e komishon di evaluashon lo tuma un siman pa evaluá i analisá tur e proposishonnan ku a drenta, pa despues presentá nan konseho final na Gerensha, Hunta di Komisario di RdK i Konseho di Minister. 

Pa mas tardá e di tres siman di Desèmber 2020, RdK lo informá ofisialmente ta kua ta e partido ku lo bai sigui negoshá ku n’é pa un akuerdo final.  Negosiashonnan lo inisiá mesora den Desèmber i ta premirá di lo kontinuá den Yanüari / Febrüari, pa logra sera akuerdonan entre RdK ku e partido selektá riba e modelo di partisipashon/ finansiamentu. Tambe lo sera akuerdo entre Gobièrnu ku e partido selektá riba kondishonnan pa manehá i operá e fasilidatnan petrolero di Kòrsou. 

RdK lo kontinuá ku su esfuersonan pa sigui informá komunidat riba e proseso importante aki pa e industria petrolero di nos pais. 

– FINAL –