EKSTENSHON DI 1 SIMAN MAS PA ENTREGA DI PROPOSISHONNAN OBLIGATORIO (BINDING PROPOSALS)

Willemstad, 11 di Desèmber 2020 – Den un komunikado di prensa fechá 27 di  Novèmber último, Refineria di Kòrsou (RdK) a informá komunidat ku a esktendé e fecha pa entrega di proposishonnan obligatorio te ku 11 di Desèmber.

E proseso pa logra informá e partner potensial riba tur aspekto di e fasilidatnan i logra kaba su “due diligence” a dura poko mas  largu ku a premirá, debí na entre otro ku ekspertonan di algun partido no por yega Kòrsou pa kompletá nan investigashon riba e fasilidatnan petrolero. Esaki a resultá den mas yamada i konferensha via medionan elektróniko pa klarifiká puntonan esensial. Ademas komo ta trata di invershonnan kuantioso, mester hasi análisis profundo, estudionan i tambe tene deliberashonnan entre e partidonan di e konsortio. 

Project Management Organization (PMO) di Refineria di Kòrsou (RdK)  su meta ta pa tur partido haña trato igual i akseso na mesun informashon. Den konsulta ku organonan statutario di RdK a kumbiní pa akomodá tur partido, dunando 1 siman adishonal pa entregá e ofertanan obligatorio, pues awor e fecha final pa entregá e oferta obligatorio ta bira 18 di Desèmber. Segun plan di trabou, PMO i RdK ta antisipá di lo finalisá e proseso di evaluashon i aprobashon pa mas tardá e último siman di Desèmber.

RdK lo kontinuá ku su esfuersonan pa sigui informá komunidat riba e proseso aki pa e industria petrolero di nos pais.

 – FIN-