Komunikado di prensa

CRU TA FIRMA KU SPS DRILLING E&P PA E PROMÉ AKUERDO PA ALMASENÁ KRUDO NA BULLENBAAI

Willemstad – Curaçao Refinery Utilities B.V. (CRU) riba 15 di Sèptèmber a firma un akuerdo pa almasenahe di krudo i produktonan na nos terminal di Bullenbaai. Asin’aki CRU ta revitalisá  e operashon di e fasilidat di almansenahe na Bullenbaai. Nos mes staf i personal a hinka hopi esfuerso pa asina por ofresé e fasilidat na klientenan rònt mundu ku ta interesá den e kapasidat di almasená petroli.  E promé kompania ku CRU a yega na un akuerdo ku’né den e kuadro aki ta SPS Drilling E&P

SPS Drilling E&P tin su ofisina prinsipal na Houston, Merka, i tin ofisina tambe na London, Inglatera. SPS Drilling E&P ta un kompania global ku eksperensha komprobá den industria petrolero, produktonan petrokímiko, gas i mina.  E kompania ta dediká su mes na proveé solushon praktiko efisiente pa e nesesidat di merkado global.

Project Management Organization (PMO) di RdK ta un grupo di profeshonal lokal ku a bin ta dirigí e proseso pa buska klientenan pa e fasilidat di almansená na Bullenbaai pa medio di un proseso transparente i efisiente. E kompania SPS Drilling E&P i otro kompanianan a partisipá na e proseso di lisitashon kompetitivo ku RdK a inisiá i ku finalmente a resultá den un akuerdo di almasenahe pa  petroli i produktonan petrolero, en espera di areglonan ku lo yega na dje, ora tin un operadó pa e fasilidatnan petrolero di Kòrsou.

CRU i su staf a traha durante 4 luna kontinuamente pa pone e tankinan di almasenahe disponibel.  RdK a invertí 5 mion florin pa hasi e tankinan aki kla pa almasenahe.  E invershon aki a hasi  posibel ku awor por komersialisá un kapasidat di almasenahe di 5.8 mion barí na terser partido.


Entradanan generá pa CRU i RdK dor di komersialisashon di almasenahe lo keda usá pa ‘upgrade’ e parke di tanki, ehekutá e plan di mantenshon di CRU i kubri gastunan di operashon di e personal di CRU.

David de Haseth den su kalidat komo gerente general di CRU, a bisa: “Nos ta kontentu di por ta asina leu ku nos por sigui brinda servisio di terminal na Bullenbaai, manera tabata kustumber den pasado. Nos empleadonan ta kla i ku beneplásito nos ta risibí e barkunan ku lo trese krudo i produkto pa nos almasená na Bullenbaai.”

-FIN-