Deklarashon

A SELEKTA PARTIDONAN PA ENTREGA OFERTA DEFINITIVO PA MANEHA I OPERA FASILIDATNAN PETROLERO DI KÒRSOU

Willemstad 30 di Òktober  Den un komunikado di prensa  fechá 14 di òktober  RDK a informá komunidat riba e proseso di búskeda di un partner stratégiko pa nos fasilidatnan petrolero. RDK na e okashon ei a informá riba e kantidat di partidonan ku a entrega nan oferta  no-oblgatorio (“non-binding proposal”).

Dia 26 di òktober último e grupo interno (“komishon di evaluashon”)  ku ta evaluá tur oferta entregá pa partidonan interesá a studia tur material i a yega na un lista kòrtiku (“short list”) di interesadonan ku bou di sierto kondishon lo por duna e mihó kontribushon i asina garantisá éksito pa proyekto Arawak . 

E ophetivo prinsipal di proyekto Arawak, manera ta konosi, ta pa buska i yega na un partner stratégiko pa durashon largu pa manehá i opera e refineria, Bullenbaai i e planta di utilidat CRU.

Despues ku e komishon di evaluashon a presentá nan konseho final di e fase di ofertanan no obligatorio na direktiva i hunta di komisario di RDK, PMO a risibí aprobashon di tur e órganonan aki pa bou di sierto kondishon sigui ku un grupo mas chikí di interesadonan potensial pa nos fasilidatnan petrolero den e proksimo fase. Anteriormente Konseho di Minister a aproba e sekuensia di akshon aki (Timeline) di PMO.

Awor lo bai kuminsá e fase di entrega di un proposishon obligatorio (“binding proposals”) pa mas tardá dia 27 di novèmber pa e komishon di evaluashon por skohe e partido ku mihó por kumpli ku kriterionan establesé.

Pa dia 4 di desèmber próksimo lo bai skohe finalmente e partido preferí (“preferred bidder”) pa kuminsá negosiashon pa traha riba un akuerdo final pa manehá i opera e fasilidatnan petrolero.

RDK lo kontinuá ku su esfuersonan pa sigui informá komunidat riba e proseso importante aki pa e industria petrolero di nos pais.

  FINAL